Their opinion ???

 

မြန်မာမှာ မတ်လနဲ့ ဧပြီလအတွင်း အင်တာနက်တွေအပိတ်ခံလိုက်ရတာ အားလုံး ကြားကြ/သိကြမယ်ထင်တယ်။ ကိုဗစ်ကာလမှာကတည်းက လူတွေဟာ အင်တာနက်ကိုပဲ အသုံးချပြီး အလုပ်လုပ်ကြ/ဆက်သွယ်ကြ/ပညာသင်ကြ/စီးပွားရှာကြရာက အရာအားလုံးဟာ မှောင်အတိကျသွားကြတယ်။ လုပ်သမျှအားလုံးကို တိကနဲရပ်ပစ်ရပြီး လမ်းတွေပျောက်ကာ ဘာတွေဖြစ်သွားမှာလဲဆိုတဲ့ မရေမရာအတွေးတွေနဲ့ ဘဝဟာ အဓိပ္ပာယ်မဲ့သွားသလို ဖြစ်သွားကြတယ်။ ပြေးနေတဲ့သူတစ်ယောက် ရုတ်တရက်ရပ်လိုက်တော့ အမော့ဆို့သွားသလိုမျိုး။

ရန်ကုန်လိုမြို့ကြီးတွေမှာတော့ FTTH service providers တွေ အများကြီး ရွေးချယ်စရာရှိတော့ အခက်အခဲဟာ နယ်တွေမှာ ပိုများနိုင်တယ်။ နယ်တွေမှာက FTTH ရတဲ့ နေရာဆိုတာ အကန့်အသတ်နဲ့ရှိနေသေးတာကိုး.။ ကျွန်မအလုပ်သစ်တစ်ခုကို ပြောင်းလိုက်တဲ့ ၂၀၂၀ ဒီဇင်ဘာလကတည်းက အိမ်မှာပဲ teleoworking လုပ်ဖြစ်တယ်။ ကျွန်မနေတဲ့နေရာမှာ FTTH network မရှိတော့ broadband wifi ကိုပဲ သုံးနေခဲ့တာ။ အလုပ်လုပ်ရင်း အလုပ်ကသင်တန်းတွေရော၊ edx ကသင်တန်းတွေရော တက်လက်စတွေရှိနေတယ်။ အင်တာနက်တွေပိတ်လိုက်တဲ့အခါ ကျွန်မမှာ အရေးကြီးတဲ့အစည်းအဝေးတွေကို လမ်းဘေးဝိုင်ဖိုင်ရတဲ့နေရာမှာ ရှာသုံးရတဲ့အထိ အခြေအနေဖြစ်သွားခဲ့ပါသေးတယ်။ 

အဲဒီလိုနဲ့ FTTH network ရှိတဲ့ နေရာက အိမ်ခန်းတစ်ခုမှာ အင်တာနက်တပ်ဖို့ ကုမ္ပဏီတစ်ခုကို စာရင်းပေးခဲ့တော့ တစ်လခွဲလောက်အကြာမှ တပ်ဖို့လာကြည့်ကြတယ်။ မျှော်လင့်ချက်တွေနဲ့ ကျွန်မမှာ ထပ်ပြီးမျှော်လင့်ချက်မဲ့ရပြန်တာပါပဲ.။ အင်တာနက်ကြိုးတွေက ကျွန်မအိမ်နားထိမရောက်သေးလို့ သူတို့ network ချဲ့ပြီးချိန်ထိ နောက်ထပ် ၂ လလောက် ထပ်စောင့်ရဦးမယ်ဆိုပဲ။ လူတိုင်းလိုလိုဟာ အင်တာနက်နဲ့ ချိတ်ဆက်အလုပ်လုပ်နေရတာဆိုတော့ အိမ်နားက လူတွေရော ဘာတွေများသုံးနေကြသလဲ သိရရင် ကျွန်မအတွက် နောက်ထပ်ရွေးချယ်စရာ အင်တာနက်လိုင်းရမှာပဲဆိုတဲ့အသိနဲ့ ဘေးအိမ်က လူတစ်ယောက်ကို မေးလိုက်မိတယ်။ သူဖြေတဲ့အဖြေကြားချိန်မှာ ကျွန်မဟာ မြန်မာကလူတွေအခြေအနေကို လုံးဝသဘောပေါက်သွားခဲ့ရပြီး ဆွံ့အသွားခဲ့ရတာ။ သူပြောတာက "mobile network တွေမှာ banking app တွေ ပြန်ဖွင့်ပေးနေပြီမို့ အဲဒါပဲ သုံးတော့တယ်။ ကျွန်တော်က facebook မကြည့်တော့ အင်တာနက်မလိုဘူးလေ" တဲ့။ 

အဲဒီကာလက တကယ််တမ်းတော့ သတင်းစီးဆင်းမှုတွေ ရပ်စေချင်လို့ မြန်မာကလူတွေဟာ facebook ကိုအဓိကထားသုံးပြီး သတင်းဖလှယ်ရာနေရာမို့ အင်တာနက်တွေကို တမင်အဖြတ်ခံထားရတာလေ။ ကျွန်မအမြင်ကတော့ ဒီလူရဲ့အတွေးမှာ ကျွန်မအင်တာနက်ကို အသည်းအသန်တပ်ချင်နေတာဟာ facebook ကြောင့်လို့ ထင်နေပုံရတယ်။ မြန်မာက နယ်တော်တော်များများမှာ အင်တာနက်ဆိုတာနဲ့ facebook ပဲ ပြေးမြင်ကြတာမဟုတ်လား။ သူပြောတဲ့စကားအသွားအလာဟာ အများကြီးရှိသေးတယ်ဆိုပေမယ့် ဒီနေရာမှာတော့ ကျွန်မဘာမှ ထပ်မရေးလိုတော့ပါဘူး။ အားလုံးဆက်စပ်စဉ်းစားနိုင်မယ်ထင်တယ်။ သူ့ကို ဟုတ်ကဲ့၊ ကျေးဇူးတင်ပါတယ်လို့သာ ယဉ်ယဉ်ကျေးကျေးပြန်ပြောခဲ့ပြီး ဘာမှ ဆက်မရှင်းပြခဲ့တော့ပါဘူး။ တကယ်တမ်းတော့ အင်တာနက်ဆိုတာ ကျွန်မတို့ကို ကမ္ဘာကြီးနဲ့တင်မက စကြာဝဠာ/နေအဖွဲ့အစည်း/ဂြိုလ်တွေနဲ့ပါ ဆက်သွယ်ပေးထားတဲ့နေရာဖြစ်ကြောင်း၊ ဒီအင်တာနက်ကို အသုံးချအလုပ်လုပ်ပြီး ဝင်ငွေတွေ ဒေါ်လာများစွာ ရှာလို့ရကြောင်း၊ သင်ချင်တဲ့ပညာကို အိမ်ထဲကနေ လေ့လာရုံနဲ့ ကမ္ဘာ့အနှံ့က တက္ကသိုလ်/အဖွဲ့အစည်းတွေက လက်မှတ်တွေ/ဘွဲ့တွေကို ရနိုင်ကြောင်း စသဖြင့်သော အကျိုးကျေးဇူးတွေ အများကြီးရှိပါတယ်။ 

တိုးတက်တဲ့ လူ့အဖွဲ့အစည်းမှာ လက်ရှိနေနေသူတွေ၊ ယုတ်စွအဆုံး ရန်ကုန်မြို့ကြီးမှာ နေကြသူတွေ၊ ပညာနဲ့အသက်မွေးသူတွေကတော့ ဒီခေတ်ကြီးမှာ အဲလိုလူမျိုးတွေရှိသေးတာလားလို့ အံ့ဩကောင်း အံ့ဩကြလိမ့်မယ်။ နယ်တွေမှာ အင်တာနက်ဆိုတာနဲ့ Facebook ပဲ ပြေးမြင်ကြတဲ့/ဖတ်စရာလေ့လာစရာဟာ Facebook ပေါ်မှာ အားလုံးရနိုင်တယ်လို့ထင်တဲ့ လူတွေအများကြီးရှိတယ်။ ဒါတောင် သူတို့ဟာ အခြားသူတွေထက်စာရင် advanced ဖြစ်တယ်လို့ ဆိုနိုင်တယ်နော်။ ဘာမှ မဖတ်ရှု/မလေ့လာဘဲ ဦးနှောက်ကို ဒီအတိုင်းပစ်ထားတဲ့သူတွေဆိုတာ ပိုများတယ်။ ဦးနှောက်ကို ပိုကောင်းအောင်/ပိုတွေးတောဆင်ခြင်နိုင်အောင် လေ့ကျင့်မှုမလုပ်တဲ့အခါ ဘဝမှာ ကြုံတွေ့ဖြစ်ပျက်တာတွေကို အဲဒီဦးနှောက်/အဲဒီအသိတရားနဲ့ ဘယ်လိုများ သုံးသပ်ဆုံးဖြတ်ကြပါ့မလဲ၊ မှန်ကန်တဲ့ဖက်ကိုရောက်အောင် ဆုံးဖြတ်နိုင်ကြပါ့မလား ???