Sunday 27 June 2021

Planting good morning flowers, one of the stress relief ideas ✨✨✨

by Phyu Lwin on June 27, 2021

ဒီတလောတော့ အားလုံးနဲ့အတူတူ ကျွန်မလည်း ခံစားချက်ပေါင်းစုံနဲ့ စိတ်ဓါတ်ကျ၊ မပျော်မရွှင်ဖြစ်ကာ နေ့တိုင်းကို အားတင်းရပ်တည်နေရတာပါပဲ။

ဒီလိုနဲ့ စိတ်ဖိစီးမှုတွေ ပြေလျော့စေဖို့ရာ အပင်စိုက်ခြင်းဖြင့်လည်း တစ်ဖက်တစ်လမ်းက ကုစားဖြစ်ပါတယ်။ 

ဒီတလောမှာ ရွက်လှပင်တွေထက် အပွင့်ပွင့်တဲ့အပင်တွေကို ပိုပြီး စိတ်ဝင်တစားစိုက်ဖြစ်တယ်။ မနက်နိုးလာတာနဲ့ ပန်းရောင်စုံကိုမြင်ရတာအပြင် အနံ့မွှေးတဲ့ပန်းလေးတွေဆို ပန်းရနံ့ဟာ စိတ်ကိုအေးချမ်းသွားစေပြီး စိတ်ဖိစီးမှုကို တမျိုးတဖုံ လျော့ကျစေတာကြောင့် ပိုစိုက်ဖြစ်တယ်။ ပြီးတော့ အခုအချိန်ဟာ မိုးရာသီမို့ တသီးတသန့်ပြုစုစရာမလိုဘဲ သဘာဝအတိုင်း မိုးရေ၊ နေရောင်တွေနဲ့ အပင်တွေဟာ သန်စွမ်းပြီး အပွင့်တွေပိုပွင့်တာလည်း ပါပါတယ်။ ကိုယ်စိုက်တဲ့အပင်လေးတွေက ပန်းလေးတွေ ပွင့်လာတဲ့အခါ ပြီးမြောက်မှုကို ခံစားရပြီး စိတ်အားကို တက်ကြွစေပါတယ်။

အပွင့်ပွင့်တဲ့ အပင်တွေအများကြီးထဲမှာမှ အခုပြောပြမယ့် Morning flowers လေးတွေဟာ ချစ်စရာကောင်းလှသလို ပန်းစိုက်သူအတွက် စိတ်ချမ်းသာမှုကို အမြန်ပေးနိုင်ပါတယ်။ အချို့ကတော့ မနက် ၉ နာရီလောက်ပွင့်တာမို့ ၉ နာရီပန်းလို့လည်း ခေါ်သလို Moss rose, sun rose စသဖြင့်လည်း ခေါ်ဆိုကြပါတယ်။ အရင်နေတဲ့နေရာက အနောက်ဖက်လှည့်မို့ မနက်နေရောင်မရတဲ့အခါ ဘယ်ပန်းပင်မှ မပွင့်ပါဘူး။ ပန်းပွင့်တဲ့အပင်တွေဟာ မနက်နေရောင်ကို မရှိမဖြစ်လိုအပ်လှပြီး တစ်နေ့မှာ အနည်းဆုံး ၆ နာရီလောက် နေရောင်ရဖို့ လိုပါသတဲ့။ ဒီပန်းပင်လေးတွေကိုလည်း အရင်အိမ်မှာစိုက်ပြီး ဘယ်လောက်ပဲပြုစုပေမယ့် မနက်ခင်းနေရောင်မရတဲ့နေရာဖြစ်တာမို့ အပွင့်ဖြစ်ဖို့ မဆိုထားနဲ့၊ အဖူးတောင် ထွက်မလာပါဘူး။ အပင်တောင်မှပဲ သူနဲ့အပ်စပ်တဲ့နေရာမဟုတ်တဲ့အခါ၊ သူအောင်မြင်ဖို့ ထောက်ပံ့ပေးမယ့်အရာတွေမရှိတဲ့နေရာဖြစ်တဲ့အခါ ရှင်သန်ဖို့ ခဲယဉ်းပါတယ်။

အခုနေတဲ့နေရာကတော့ အရှေ့ဖက်လှည့်ဖြစ်တာကြောင့် အိမ်ရှေ့ဟာ တစ်မနက်လုံးအပြင် တနေကုန်ပါ နေရလို့ စိုက်သမျှအပင်တိုင်းပွင့်ပြီး စိတ်ချမ်းသာပါတယ်။ တသီးတသန့်ကြီး ပြုစုစရာမလိုဘဲ သူတို့လိုအပ်တဲ့အရာတွေရှိတဲ့အခါ စွမ်းသလောက် ဖူးပွင့်ခွင့်ရကြပါတယ်။ 
ခုမှ ပန်းပင်စစိုက်မယ်၊ ပန်းပွင့်တာလည်း ချက်ချင်းမြင်လိုတယ်၊ တယုတယပြုစုဖို့ အချိန်မပေးနိုင်ဘူးဆိုရင်   Morning flowers  လေးတွေ စိုက်စေချင်တယ်။ အရောင်စုံအသွေးစုံနဲ့ လှပနေတဲ့ ပန်းခင်းဟာ စိုက်သူရဲ့ ပီတိကို အမြင့်ဆုံးထိရောက်စေတယ်။ စစိုက်တဲ့အချိန်မှာလည်း ဘာမှသိပ်မလိုဘဲ ရေဆင်းကောင်းတဲ့ စပ်မြေနဲ့ဆို ကိုင်းချိုးစိုက်တာနဲ့တင် ၃ ရက်လောက်ဆို အမြစ်စွဲပါပြီ။ ဒီလိုနဲ့ စိုက်တဲ့ကိုင်းက ရင့်ရင်ရင်သလို အဖူး/အပွင့်တွေ အစီအရီ ထွက်လာပါလိမ့်မယ်။ အိမ်ရှေ့မှာ ချိတ်ဆွဲအိုးလေးတွေနဲ့ဖြစ်ဖြစ်၊ မြက်ခင်းလို မြေကြီးမှာပဲ စိုက်စိုက်၊ အမျိုးမျိုးသောပုံစံနဲ့ အလှဆင်စိုက်လို့ရတာမို့ ကျွန်မကတော့ အရောင်တွေစုံအောင် စုရင်း စိုက်ဖြစ်တဲ့အကြောင်း ဝေမျှဖြစ်တာပါ။