စာရေးခြင်း အနုပညာ ~~

“ခံစားချက်တွေ ပြင်းလှချည်လား …”

“ရင်ဖွင့်လှချည်လား .. ခုထိ ခံစားနေရတာတွေ မလျှော့နိုင်သေးဘူးလားကွာ”

“ကြိ်ုက်သလောက်သာ ရင်ဖွင့်လိုက်စမ်းပါ .. like တွေပေးပြီး ကုသိုလ်ပြုဖို့အဆင်သင့်ပဲ”

“ဒီတစ်ခါရေးတာ ခံစားချက်တွေ ပိုပါသလိုပဲနော်…။”

“တော်တော်ခံစားနေရတယ်ထင်တယ်…”

စတဲ့စတဲ့ စသလိုလို လှောင်သလိုလို စကားတွေ ကြားမိတဲ့အခါ စိတ်အခန့်မသင့်တဲ့အချိန်နဲ့ဆိုရင် တစ်မျိုးတော့ ခံစားရပါတယ်….။

လူတစ်ယောက်ရဲ့ အားလပ်ချိန်ကို အကျိုးရှိရှိအသုံးချချင်တဲ့ ကြီးမားလွန်းတဲ့ဝါသနာကို လျစ်လျူရှုရက်လေခြင်းရယ်လို့ စိတ်မကောင်းလဲဖြစ်မိပါတယ်…။

လူတိုင်းနီးပါး ဘ၀မှာ ရှင်သန်ရပ်တည်ဖို့အပြင် ဂုဏ်သိက္ခာအတွက်ဖြစ်စေ၊ လူတွေကြားမှာ လူအဖြစ် နေထိုင်နိုင်ဖို့အတွက်ဖြစ်စေ သက်ဆိုင်ရာ professional job တစ်ခုခုတော့ မဖြစ်မနေ လုပ်ကိုင်နေကြတာပါပဲ..။ ဒါပေမယ့် အလုပ်တွေကြားထဲမှာပဲ နှစ်ပြီး နေ့စဉ်သမားရိုးကျ တသမှတ်တည်း ဖြတ်သန်းနေရတဲ့အခါ ဘ၀က လူဆိုတာထက် သံပတ်ပေးထားတဲ့စက်ရုပ်တစ်ခုနဲ့ ဘာမှမခြားနားတော့ပြန်ဘူး…..။ ဘ၀မှာ စိတ်ချမ်းမြေ့သာယာမှုဆိုတာ ကိုယ်လုပ်ချင်တဲ့အရာမျိုးကို သက်တောင့်သက်သာ လုပ်ကိုင်ရတဲ့အခါမျိုးမှာသာ ရရှိခံစားလာနိုင်တယ်မဟုတ်လားးးး…။ အဲဒါကြောင့် လူသားတွေမှာ မဖြစ်မနေလုပ်ကိုင်ကြတဲ့ professional အလုပ်အပြင် အားလပ်ချိန်တွေမှာ စိတ်အပန်းပြေစေဖို့ လုပ်ကိုင်တဲ့ ၀ါသနာပါရာအလုပ်တစ်ခုခုတော့ ရှိသင့်တယ်..။ အဲဒီအခါမှသာ ဘ၀ဟာ နေပျော်လာပြီး အလုပ်ထဲကရလာတဲ့မွန်းကြပ်မှုတွေကိုလည်း လျှော့ချလာနိုင်ကာ ဘ၀ရဲ့အနှစ်သာရကို ပြည့်ပြည့်၀၀ခံစားနိုင်မှာပေါ့….။

အဲဒီလိုဆိုတော့ ကျမရဲ့ဝါသနာတစ်ခုက စာဖတ်ခြင်း စာရေးခြင်းဆိုတာ ခဏခဏရေးမိလို့ အားလုံးလိုလို သတိထားမိပါတယ်….။ အားချိန်လေးနည်းနည်းရလာတာနဲ့ ကျမ စာဖတ်လေ့ရှိပါတယ်..။ စာရေးချင်တဲ့စိတ်ပေါ်လာပြီဆိုရင် အချိန်လည်း နည်းနည်းပိုရတယ်လို့ သတ်မှတ်ရင် တစ်ခုမဟုတ်တစ်ခုတော့ ကျမဒီနေရာမှာရေးလေ့ရှိပါတယ်..။

တစ်ခါတရံ စာတွေနဲ့ပိနေတဲ့အခါမျိုးမှာ ဘယ်လိုမှစာရေးဖို့အခွင့်မသာခဲ့ရင်တော့ တစ်နေ့ပြီးတစ်နေ့ ဒီ Blog ကိုဖွင့်ဖွင့်ကြည့်ပြီး …. စာအသစ်မရေးပေမယ့် လာလည်နေကျ သူငယ်ချင်းတွေကို အားတုံ့အားနာဖြစ်နေတတ်ပြန်ပါသေးတယ်…။ ဒီနေရာမှာ ဒီလိုစာရေးလေ့ရှိတဲ့အတွက်ကြောင့် မိသားစုနဲ့ဝေးနေတဲ့နေရာမှာ … ပျင်းစရာ ငြီးငွေ့စရာကောင်းလှတယ်.. အိမ်ကိုလွမ်းလှချည်ရဲ့လို့ မျက်ရည်ကျမိတဲ့အချိန်ဆိုတာ မရှိခဲ့လောက်အောင် လွမ်းစိတ်ဆိုတာဝင်မလာနိုင်လောက်အောင် … အချိန်တွေကို အသုံးချနိုင်ခဲ့တယ်..။ တစ်ယောက်တည်း ပျင်းလွန်းလို့ဆိုပြီး အခြားသူငယ်ချင်းတွေကို စကားစမြည်သွားပြော သူတို့ရဲ့အချိန်တွေကို ခိုးယူတဲ့အပြုအမူမျိုး ဘယ်တော့မှ မလုပ်ဖြစ်ခဲ့ဘူး…။

စာရေးတော့မယ်ဆိုရင် အများအားဖြင့် My own feelings ဆိုတဲ့ ကိုယ့်စိတ်ထဲရှိရာ ရေးချင်ရာရေးတဲ့ labels လွဲရင် ကျန်တာတွေကို ကျမဖန်တီးရေးလေ့ရှိပါတယ်…။ တချို့ကတော့ သီချင်းတွေကို ခံစားပြီးရေးတယ်..။ ၀တ္ထုတိုလေးတွေဆိုရင်တော့ ခံစားချက်တစ်ခုကို အရင်စဉ်းစားလိုက်တယ်.. ပြီးရင် ငယ်ငယ်က စာစီစာကုံးရေးတဲ့အတိုင်း အဲဒီခံစားချက်တစ်ခုကို ဖွဲ့လိုက်တယ်..။ ကဗျာတွေဆိုရင်လည်း အဲလိုပါပဲ .. အဓိကခံစားချက်တစ်ခုကို အရင်စဉ်းစားလိုက်တယ်.. ပြီးတာနဲ့ အဲဒီခံစားချက်ကို လိုက်ပြီးတော့ လှအောင် ဖွဲ့လိုက်တာမျိုးပါ …။

စာရေးခြင်းနဲ့ပတ်သက်ပြီး ကျမကြားဖူးသလို ကျမယုံကြည်မိတာတစ်ခုက စာရေးသူဟာ ကိုယ်ပိုင်စိတ်ခံစားမှုကို ဦးစားပေးပြီးရေးမယ်ဆိုရင် ဘယ်တော့မှစာရေးဆရာကောင်းဖြစ်လာမှာ မဟုတ်ဘူးဆိုတာပဲပေါ့ …။ နောက်ပြီး ညီမလေးတစ်ယောက်ပြောဖူးသလို ရင်ခုန်သံကို ခုတုံးလုပ်ပြီး စာရေးဖို့အတွက် ကုန်ကြမ်းမရှာဘူးဆိုတာလေ…။ စာရေးဆရာကောင်းဖြစ်ချင်သူက ခံစားချက်ကို ဖန်တီးတီထွင်နိုင်ရမယ်… ဖန်တီးထားတဲ့အဲဒီအရာကို လှပအောင် တန်ဆာဆင်ဖွဲ့နွဲ့တတ်ရမယ်…။ အကြောင်းအရာတစ်ခုက ဘယ်လောက်ပဲရိုးရှင်းနေပါစေ… စာရေးသူက သူ့အနုပညာနဲ့ လှလှပပဖွဲ့နွဲ့လိုက်တဲ့အခါ စာတစ်ပုဒ်က အရသာရှိတဲ့ဟင်းတစ်ခွက်လိုပဲ မချက်ပြုတ်ခင်က အရာတွေနဲ့ခြားနားစွာ စားသုံးသူအတွက် စိတ်ကျေနပ်မှုအပြည့်အ၀ရရှိခံစားနိုင်စေတယ်..။

ဒီဘလော့ဂ်လေးကို ရင်းနှီးတဲ့သူငယ်ချင်းတွေကို လုံးဝမပြောဘဲ ဒီလိုပဲရေးနေခဲ့တာတော်တော်ကြာကြာပါပဲ ..။ နာမည်ကအစ ကျမရဲ့ နာမည်အရင်း.. အရင်သုံးနေကျ ကလောင်နာမည် (အခုတော့ အဲဒီကလောင်အမည်ပြန်သုံးနေပါပြီ) တွေကို မသုံးဘဲ ကျမလို့ လုံးဝမထင်ရတဲ့ blog title နဲ့ပဲ ရေးဖြစ်နေခဲ့တယ်.. ။ စာရေးဖော် blogger သူငယ်ချင်းတစ်ယောက်ကိုတော့ ပြောဖူးပါရဲ့ …။ စသိသိချင်းဆိုတော့ သူက ကျမခံယူချက်ကို မသိသေးတော့ facebook မှာ ကျမစာရေးတဲ့အကြောင်း တစွန်းတစသိနိုင်မယ့် နာမည်ကို ကွန်မန့်မှာမေးတာပေါ့ …။ အဲဒါနဲ့ chat box ကနေ အမြန်လှမ်းပြောရတယ်.. သူငယ်ချင်းတွေ စာရေးတာ သိမှာစိုးရိမ်လို့ … တကယ်က တကယ့်စာရေးဆရာတစ်ယောက်လိုဖြစ်တဲ့အချိန်မှ အားလုံးကို ပေးသိချင်တာဆိုတော့ သူကတောင် OMG တဲ့ …။ ဘာကြောင့် ဘေးလူတွေကို အဲဒီလောက်ဂရုစိုက်ရသလဲဆိုရင် ကျမက မြန်မာ ဆိုတော့ မြန်မာလူမျိုးစရိုက် အတိုင်းပဲပေါ့…။ မြန်မာဆိုတာ ပတ်ဝန်းကျင်ကို အလွန်အာရုံစိုက်တဲ့ သူမျိုးတွေလေ… ကိုယ်တစ်ခုခုလုပ်ရင် အခြားသူတွေက ဘယ်လိုများဝေဖန်ကြမလဲ တွေးကြောက်နေတတ်သူမျိုးပေါ့…။

ဒါပေမယ့်လည်း ပတ်ဝန်းကျင်ဆိုတာလည်း ကိုယ့်ကို အဲလောက်အာရုံစိုက်နိုင်ကြတာမဟုတ်ပါဘူး…။ သူတို့မှာလည်း သူတို့အရေးကိစ္စနဲ့သူတို့ပဲ..။ လူဆိုတာ ကိုယ့်ကိစ္စကိုယ့်အရေးထက်တော့ အခြားသူအကြောင်းကို အကြာကြီးလိုက်ပြီး… စပ်စုတင်းမဆိုတတ်ကြပါဘူး…။ ကျမလည်း စာရေးလာတာ နည်းနည်းလည်းကြာလာတော့ အရင်လို မရှက်တော့သလို နည်းနည်းလည်း အရေးရဲလာတယ်လို့ ကိုယ့်ကိုယ်ကို ထင်လာမိတယ်..။… တချို့သူငယ်ချင်းတွေ စာရေးစာဖတ်တာဝါသနာပါတဲ့သူငယ်ချင်းအနည်းငယ်ကိုတော့ ပေးသိမိခဲ့တယ်… 

သူတို့လည်း ဝေဖန်ပေးပါတယ်… 

“နင် စာရေးတာ အရမ်းညံ့လွန်းတယ်” တဲ့ :D 

“ဒါက ၀ါသနာလို့တောင် ခေါ်မရတဲ့ ပေါက်ကရလေးဆယ် စာရေးခြင်းမျိုး” တဲ့.. >.< 

“စာများများဖတ်ဖို့လိုသလို အချိန်ပေးနိုင်ဖို့ကလည်း အရေးကြီးတော့ ကိုယ်ရောက်ချင်တဲ့နေရာတစ်ခုကို ရောက်ဖို့က ဝေးလွန်းသေးတယ်” ဘာညာပေါ့…။ 

ဟုတ်ပါတယ်.. ဒါက ကျမရဲ့အလုပ်မဟုတ်တော့ အချိန်မပေးနိုင်တဲ့အခါ ကိုယ်သွားချင်သလောက် ခရီးမရောက်ဘူးလေ…။ တော်တော်များများကတော့ ကျမရဲ့ ၀ါသနာကို လက်ခံပါတယ်…။ သူငယ်ချင်းအချင်းချင်း အားပေးကြပါတယ်…။

အဲ … တစ်ယောက်စ နှစ်ယောက်စတော့ ရှိတာပေါ့ …။ အသည်းကွဲဖူးတယ် ဆိုတဲ့ ပြစ်ချက်နဲ့ ရေးသမျှက အဲဒါကိုပဲ ဦးတည်ရေးနေတယ် ဆိုတဲ့စကားမျိုးနဲ့ မထိတထိ စတယ်…။ မဟုတ်လို့လားဆိုရင် ၀ါသနာတစ်ခုကို အကောင်အထည်ဖော်နေတဲ့သူမျိုးကို အဲဒီဝါသနာကို လျစ်လျူရှုပြီး သူတို့ဘာသာ ကောက်ချက်ချချင်သလိုချတာတော့ တခါတလေ စိတ်ထဲတစ်မျိုးခံစားမိတယ်…။ အသည်းကွဲတာ ဘာမှမဖြစ်တော့လို့တောင် ရည်းစားဟောင်းနဲ့ သူငယ်ချင်းလို ပြန်ပြောင်းပြောဆိုနေနိုင်ပြီဖြစ်နေတဲ့အချိန်မှာ….. မိန်းကလေးတစ်ယောက်က ယောက်ျားတစ်ယောက်ကို မမေ့နိုင်လို့ လူမသိသူမသိစာတွေရေးပြီး ကြေကွဲပြနေပါတယ်ဆိုတဲ့ အတွေးအခေါ်မျိုးက အရမ်းကို တိမ်လွန်းတယ်ထင်တယ်….။

တကယ်တော့ အနုပညာတစ်ခုကိုရူးသွပ်လွန်းတဲ့သူတွေဟာ သူတို့ရဲ့ဖန်တီးမှုကို ထိခိုက်လာတဲ့စကားလုံးတစ်ချို့ကို လက်ခံရမိရင် ခံစားပေါက်ကွဲတတ်ကြတာပဲမဟုတ်လား…။ အခြားသူတွေထက် အနုပညာကို မြတ်နိုးတဲ့သူတွေက ပိုပြီးထိရှ ခံစားလွယ်တယ်လေ…။ စာရေးခြင်းဆိုတဲ့ အနုပညာကို ရူးသွပ်မိတဲ့ကျမကလည်း …. ကျမရဲ့အချိန်တွေပေးခဲ့ရ ….. ဖန်တီးရေးခဲ့ရတဲ့အနုပညာတွေကို … အသိအမှတ်မပြုရုံမက …. ထင်ရာမြင်ရာ ခေါင်းစဉ်တစ်ခု တပ်ခံရတဲ့အခါ စိတ်မကောင်းဖြစ်မိပါတယ်….။ အဲဒီလိုနဲ့ပဲ …. ဒီပို့စ်ကိုရေးဖြစ်ခဲ့တယ် ဆိုပါတော့….။ အဲ.. စာမရေးတာလည်း တစ်ပတ်ကျော်ကျော်ကြာနေပြီဆိုတော့ တစ်ခုခုလည်း ရေးချင်မိတဲ့စိတ်လည်း ပါတာပေါ့လေ.... xP