“ချယ်ရီတွေ ပွင့်တဲ့အချိန်ကို
ရောက်လာပြန်ပြီနော်” .... သူမက တစုံတစ်ခုကို သတိရမိသယောင် ပြောလာခဲ့တော့ အချိန်ကာလတွေရဲ့
မြန်မြန်ဆန်ဆန် ရွေ့လျားပုံကို သတိပြုမိလာတယ်...။ ချယ်ရီဆိုတာ ဆောင်းရာသီရဲ့ သင်္ကေတတစ်ခုဆိုတော့
ကြေကွဲစရာကောင်းလှတဲ့ အတိတ်တစ်ချိန်ကိုများ သူမက သတိရနေလေသလား ....။ မဟုတ်နိုင်ပါဘူးလေ
.... အဲဒီအတိတ်ကာလက ပြီးသွားခဲ့တာ ကြာခဲ့ပြီပဲ....။ သူမက အတိတ်ကို ပြန်ပြောင်းသတိရရင်း
ပစ္စုပ္ပန်မှာ ၀မ်းနည်းပူဆွေးနေမယ့်သူမျိုးမဟုတ်တဲ့ ရဲရင့်သူတစ်ယောက်သာ မဟုတ်လား
....။
“ချယ်ရီပန်းလေးတွေကို
ချစ်တတ်တယ်မဟုတ်လား .. ဒီတစ်ကြိ်မ်တော့ ကိုယ်ခန့်မှန်းတာ မမှားလောက်ဘူးထင်ပါရဲ့
..” ဆိုတော့ သူမက ခေါင်းငြိမ့်လို့ဝန်ခံတယ်...။ ဆောင်းရာသီကို ချစ်သလို ဆောင်းရာသီရဲ့
အထိမ်းအမှတ်ပန်းတစ်မျိုးဖြစ်တဲ့ ချယ်ရီတွေကိုလည်း ချစ်တတ်သူဖြစ်ပါသတဲ့ ..။
သူမရဲ့ Facebook
cover photo မှာ ထုံးစံအတိုင်း ချယ်ရီပန်းခိုင်တွေအပြည့် အလှဆင်ထားပြန်ပါတယ် ....။
သူမက ရာသီအလိုက်ပြောင်းလဲပြီး ပွင့်လာတဲ့ပန်းအမျိုးမျိုးကို မှတ်တမ်းတင်တတ်သူ ... တခါတလေမှသာ
သုံးလေ့ရှိတဲ့ သူမရဲ့ Facebook မှာ ရံဖန်ရံခါ တင်တတ်သူ ..။ တခါတရံမှသာ သူမစိတ်ထဲက ခံစားမှုတချို့တလေကို
ဝေမျှတတ်သူသာ ....။ သူကတော့ လွမ်းတဲ့စိတ်က
ပြင်းပြလာတဲ့အချိန်တိုင်း ရှားရှားပါးပါးပြောင်းထားတဲ့ သူမရဲ့ profile pic ကို သွားဖွင့်ကြည့်လို့
အလွမ်းတွေကို တိုင်တည်တတ်သူ ...။
တကယ်တမ်းတော့ ၄ နှစ်ဆိုတဲ့
အချိန်ကာလက လူတစ်ယောက်ရဲ့ ခံစားချက်ကို ပြောင်းလဲစေတတ်သတဲ့လား ..။ လွန်ခဲ့တဲ့ ၄ နှစ်ဆိုတဲ့အချိန်ကာလတစ်လျှောက်လုံး
.... သူမရဲ့သတင်းတစ်ခုတလေမှ မကြားခဲ့ရချိန်မှာ ဘာကြောင့်များ သူမရဲ့ အပြောင်းအလဲတချို့ကို
နားမစွင့်ဘဲ နေခဲ့မိပါလိမ့် ..။ တကယ်ဆို ပြန်တွေ့ချိန်မှာ .... ဘေးနားက ဘ၀အဖော်နဲ့ ပျော်ရွှင်နေမယ့် ဘ၀တစ်ခုထဲက
သူမကို မြင်တွေ့နိုင်တဲ့ မုဒိတာစိတ်ကို မမွေးနိုင်ခဲ့သူမျိုးများ ဖြစ်ခဲ့လေသလား
....။ သေချာပါတယ် .... အဲဒီလိုလူမျိုးတော့ လုံးဝမဟုတ်ခဲ့ပါဘူး ...။ ဘေးနားမှာ သူမကို
သိပ်ချစ်တတ်တဲ့ချစ်သူတစ်ယောက်နဲ့ သူမဘ၀က အရာရာပြီးပြည့်စုံနေပြီဆိုတဲ့ အတွေးကြောင့်သာ
စိတ်ချနေသူတစ်ယောက်မျှသာပါ...။ အချစ်ဆိုတာ ပိုင်ဆိုင်ရမှဆိုတဲ့ အဆုံးသတ်ထက် သူမပျော်ရွှင်နေတာကိုသာ
လိုလားမိသူတစ်ယောက် မဟုတ်ပါလား ....။
သူမဘ၀ရဲ့ အပြောင်းအလဲ
...။ ပြီးတော့ ရပ်တန့်မနေတတ်တဲ့ အပြောင်းအလဲရဲ့ သဘောသဘာဝအတိုင်း သူ့ဘ၀ရဲ့ အပြောင်းအလဲအချို့
..။ လောကကြီးမှာ မပြောင်းလဲတတ်ဘဲ ရှိနေတာဆိုလို့ ပြောင်းလဲခြင်းဆိုတဲ့အရာသာ ရှိပါသတဲ့
...။ အရာရာက အချိန်ကာလရဲ့ စေစားရာအတိုင်း အလိုက်သင့်ပြောင်းလဲရင်း ... အချို့အပြောင်းအလဲတွေက
..... သဘာဝအတိုင်း ပြောင်းချိန်တန်လို့ ပြောင်းသွားတာမျိုးဖြစ်ပေမယ့် ... အချို့အပြောင်းအလဲတွေကတော့
လူတွေရဲ့ စိတ်ခံစားချက်၊ ဆုံးဖြတ်ချက်အတိုင်း ပြောင်းလဲသွားတာမျိုးတွေလည်း ကြုံတွေ့ဖူးကြပါရဲ့
...။
ခေတ်ကာလရဲ့ အပြောင်းအလဲမှာ
လိုက်ပါစီးမျောရင်း လူမှုရေးကွန်ယက်တစ်ခုဖြစ်တဲ့ Facebook ဆိုတဲ့ နေရာတစ်ခုမှာ သူမများရှိနေလေမလား
လိုက်လံရှာဖွေမိရာက ပန်းတွေကြားက သူမပုံကို မြင်တွေ့ခဲ့ရပါတယ်...။ အဲဒီအချိန်ကာလက ဆောင်းရာသီနှောင်းပိုင်းဖြစ်သလို
ချယ်ရီတွေပွင့်တဲ့အချိန် .. ချယ်ရီပင်တွေရှိတဲ့နေရာမှာ ရောက်နေတဲ့သူမက ချယ်ရီပန်းတွေကြား
... အပြုံးတွေနဲ့ အရင်လို လှပသွက်လက်နေဆဲ ...။ ဒါဆိုရင် ပြန်တွေ့ခဲ့ကြတာ တစ်နှစ်ပြည့်ခဲ့ပြီပဲ
....။ အချိန်ကာလတွေ ပြောင်းလာတာနဲ့မျှ ရာသီအလိုက် ပန်းပွင့်လေးတွေလည်း အမျိုးမျိုးပြောင်းလဲခဲ့သလို
... သံယောဇဉ်တွေလည်း အရောင်ပြောင်းလာပါတယ် ...။ ဆုံးဖြတ်ချက်တွေ ပီပြင်လာတာနဲ့အမျှ
စိတ်ကူးအိပ်မက်တွေက ပိုလှပလာတယ် ...။ တစ်ခုပါပဲ ..... အန္တရာယ်ကို တွေးကြောက်မနေဘဲ
... ကိုယ်ရည်ရွယ်ရာကို ဦးတည်ရင်း ရဲရဲဝင့်ဝင့် လှမ်းဝံ့သူတစ်ယောက်ဖြစ်ဖို့သာ လိုတာပါ
...။
.jpg)
1 comment:
နာမည်က စံပယ်ဆိုပေမဲ့လဲ
ချယ်ရီကိုချစ်တယ်
နောက်ပြီးအဲလိုမြန်မာပြည်(ရှမ်းပြည်)ဖက်ကချယ်ရီကိုအချစ်ဆုံးပါပဲ
ချယ်ရီနဲ့ပတ်သက်တဲ့ စာ ကဗျာတွေကိုလဲစိတ်ဝင်စားတယ်ညီမလေးရေ
Post a Comment